Kongamano kubwa la kitaifa kuhusu Uchumi Jumuishi Tanzania linatarajiwa kufanyika tarehe 18 Septemba 2025 katika Ukumbi wa Nkrumah, Ndaki ya Mbeya, likiwa na kaulimbiu isemayo “Mwenendo wa Uchumi Tanzania kuelekea Dira 2050.” Tukio hili linaandaliwa na Chuo Kikuu cha Mzumbe kwa kushirikiana na Tume ya Mipango, na linakusudia kuchochea mjadala wa kitaifa kuhusu mwelekeo wa uchumi wa taifa kuelekea malengo ya muda mrefu ya maendeleo.
kwa mara ya kwanza Kongamano hili litawakutanisha wataalamu mashuhuri wa uchumi na mipango, akiwemo Prof. Alexander Makulilo ambaye ni mwenyekiti wa kongamano na Kigoda cha Mwl Nyerere, Dkt. Fred Msemwa (mchambuzi wa sera), Ndugu David Kafulila Mkurugenzi Mtendaji wa PPPC, pamoja na wahadhiri kutoka Chuo Kikuu cha Mzumbe na Chuo Kikuu cha Dar es Salaam—Dkt. Gladness Salema, Dkt. Jasinta Kahyoza, na Prof. Humphrey Moshi. Uwepo wa Kafulila ni wa kipekee, si tu kama Mchambuzi, bali pia kama Mkurugenzi Mtendaji wa Kituo cha PPP (Public-Private Partnerships), akiwakilisha dira ya ushirikiano wa sekta binafsi na umma katika kufanikisha maendeleo ya Dira ta taifa ya 2050.
Katika muktadha wa kongamano hili, Dira ya Taifa ya Maendeleo 2050 imeweka malengo makubwa ya kiuchumi, ikiwemo kufikia pato la taifa la dola trilioni moja. Kati ya kiasi hicho, takriban dola bilioni 700 zinatarajiwa kutoka kwenye miradi ya PPP, jambo linaloonesha uzito wa mchango wa sekta binafsi katika maendeleo ya taifa. Kafulila amekuwa mstari wa mbele kusisitiza kuwa PPP si tu njia ya kuongeza mtaji, bali ni mfumo wa kuleta ufanisi, uwajibikaji, na ubunifu katika utekelezaji wa miradi mikubwa ya kitaifa. Kwa mujibu wa Dira ya 2050, sekta binafsi inatarajiwa kuwa injini ya ukuaji wa uchumi, ikichochea ajira, ushindani wa kimataifa, na ustawi wa jamii.
Aidha, Dira ya 2050 inalenga kuhakikisha kila Mtanzania anafikia kipato cha wastani cha dola 7,000 kwa mwaka, sawa na takriban shilingi 17.5 milioni, au shilingi 50,000 kwa siku. Hii ni hatua kubwa inayolenga kuboresha hali ya maisha, kupunguza umasikini, na kukuza usawa wa kiuchumi. Ili kufanikisha malengo haya, mikakati mbalimbali imebainishwa ikiwemo mageuzi ya kilimo, uwekezaji katika miundombinu, elimu ya ujuzi, na ushirikiano wa sekta binafsi kupitia PPP.
Kwa ujumla, kongamano hili linatarajiwa kuwa jukwaa muhimu la kuchochea fikra mpya, sera bunifu, na mshikamano wa kitaifa kuelekea Tanzania yenye uchumi jumuishi, endelevu, na wa kisasa ifikapo mwaka 2050—ambapo sekta binafsi na umma watashirikiana kwa dhati kufanikisha ndoto ya taifa la kipato cha juu.
